Prologue
i Ici cumuncet amiable cançun e spiritel raisun d'iceol noble
barun, Eufemien par num, e de la vie de sum filz boneürét
del quel nus avum oït lire e canter; par le divine volentét, il
desirrables icel sul filz angendrat. Aprés la naisance ço fut
v emfes de Deu methime amét e de pere e de mere par grant
certét nurrit; la sue juvente fut honeste e spiritel. Par l'amistét
del surerain pietét, la sue spouse juvene cumandat al spus vif de
veritét, ki est un sul faitur e regnet an trinitiet. Icesta istorie
est amiable grace e suverain[e] consulaciun a cascun memorie
x spiritel, les quels vivent purement salunc castetheét, e digne-
ment sei delitent es goies del ciel ed es noces virginels.
I Bons fut le siecles al tems anciënour,
Quer feit i eret e justisie ed amour,
S'i ert credance, dont or n'i at nul prout;
Toz est mudez, perdude at sa colour:
Ja mais n'iert tels com fut as anceisours.
II Al tems Noe ed al tems Abraam
Ed al David, cui Deus par amat tant,
Bons fut li siecles: ja mais n'iert si vaillanz;
Vielz est e fraieles, toz s'en voit declinant,
Sist empeiriez toz biens vait remanant.
III Puis icel tems que Deus nos vint salver
Nostre anceisour ourent crestiantet,
Si fut uns sire de Rome la citet;
Riches om fut, de grant nobilitet:
Por çol vos di d'un son fil vueil parler.
IV Eufemiiens, si out a nom li pedre,
Coms fut de Rome, del mielz qui donc i eret;
Sour toz ses pers l'amat li emperedre.
Donc prist moillier vaillant ed onorede,
Des mielz gentils de tote la contrede.
V Puis converserent ensemble longement.
Qued enfant n'ourent peisent lour en fortement;
Deu en apelent amdui parfitement:
"E! reis celestes, par ton comandement
Enfant nos done qui seit a ton talent!"
VI Tant li preierent par grant umilitet
Que la moillier donat feconditet:
Un fil lour donet, si luin sourent bon gret.
De saint batesme l'ont fait regenerer:
Bel nom li mistrent solanc crestiantet.
VII Batisiez fut, si out nom Alexis:
Qui l'out portet volentiers le nodrit;
Puis li bons pedre ad escole le mist:
Tant aprist letres que bien en fut guarniz;
Puis vait li enfes l'emperedour servir.
VIII Quant veit li pedre que mais n'avrat enfant,
Mais que cel soul cui il par amat tant,
Donc se porpenset del siecle ad en avant:
Or vuelt que prenget moillier a son vivant;
Donc li achatet fille ad un noble franc.
IX Fut la pulcele de molt halt parentet,
Fille ad un comte de Rome la citet:
N'at plus enfant, li vuelt molt onorer.
Ensemble en vont li dui perdre parler:
Lour dous enfanz vuelent faire assembler.
X Noment le terme de lour assemblement;
Quant vint al faire, donc le font gentement:
Damz Alexis l'esposat belement;
Mais cost tels plaiz dont ne volsist neient:
De tot en tot a Deu at son talent.
XI Quant li jorz passet ed il fut anoitiet,
Ço dist li pedre: "Filz, quer ten va colchier
Avuec ta spouse, al comant del ciel."
Ne volst li enfes son pedre corrocier:
Vait en la chambre o sa gentil moillier.
XII Com vit le lit, esguardet la pulcele,
Donc li remembret de son seignour celeste,
Que plus at chier que tote rien terrestre:
"E! Deus", dist il, "si forz pechiez m'apresset!
S'or ne m'en fui, molt criem que ne t'en perde."
XIII Quant en la chambre furent tuit soul remes,
Damz Alexis la prist ad apeler:
La mortel vide li prist molt a blasmer,
De la celeste li mostrat veritet;
Mais lui ert tart qued il s'en fust tornez.
XIV "Oz mei, pulcele? Celui tien ad espous
Qui nos redemst de son sanc precious.
En icest siecle nen at parfite amour:
La vide est fraiele, n'i at durable onour;
Ceste ledece revert a grant tristour."
XV Quant sa raison li at tote mostrede,
Donc li comandet les renges de sa spede
Ed un anel dont il l'out esposede.
Donc en ist fors de la chambre son pedre:
En mie nuit s'en fuit de la contrede.
XVI Donc vint edrant dreitement a la mer:
la nef est prest o il deveit entrer;
Donet son pris ed enz est aloez;
Drecent lour sigle, laissent corre par mer:
La pristrent terre o Deus lour volst doner.
XVII Dreit a Lalice, ço fut citet molt bele,
Iluec arrivet sainement la nacele.
Donc en eissit damz Alexis a terre;
Mais ço ne sai com longes i converset:
O qued il seit de Deu servir ne cesset.
XVIII Puis s'en alat en Alsis la citet
Por une imagene dont il odit parler,
Qued angele firent par commandement Deu
El nom la virgene qui portat salvetet,
Sainte Marie, qui portat Damnedeu.
XIX Tot son aveir qu'o sei en at portet,
Tot le depart, que giens ne luin remest;
Larges almosnes par Alsis la citet
Donat as povres o qu'il les pout trover:
Por nul aveir ne volst estre encomrez.
XX Quant son aveir lour at tot departit,
Entre les povres s'assist damz Alexis,
Receut l'almosne quant Deus la li tamist:
Tant en retient dont son cors puet guarir;
Se luin remaint, sil rent as poverins.
XXI Or revendrai al pedre ed a la medre
Ed a la spouse qui soule fut remese.
Quant il ço sourent qued il foïz s'en eret,
Ço fut granz duels qued il en demenerent
E granz deplainz par tote la contrede.
XXII Co dist li pedre: "Chiers filz, com t'ai perdut!"
Respont la medre: "Laisse! qu'est devenuz?"
Ço dist la spouse: "Pechiez le mat tolut.
Amis, bels sire, si pou vos ai out!
Or sui si graime que ne ouis estre plus."
XXIII Donc prent li pedre de ses meillours serjanz:
Par moltes terres fiat querre son enfant,
Jusque en Alsis en vindrent dui edrant:
Iluec troverent dam Alexis sedant;
Mais ne reconurent son vis ne son semblant.
XXIV Si out li enfes sa tendre charn mudede
Nel reconourent li dui serjant son pedre:
A lui medisme ont l'almosne donede;
Il la receut come li altre fredre.
Nel reconourent, sempres s'en retornerent.
XXV Nel reconourent ne ne l'ont enterciet.
Damz Alexis en lodet Deu del ciel
D'icez sons sers cui il est almosniers;
Il fut lour sire, ore est lour provendiers:
Ne vos sai dire come il s'en firent liez.
XXVI Cil s'en repaidrent a Rome la citet,
Noncent al pedre que nel pourent trover.
Sed il fut graims ne l'estuet demander.
La bone medre s'en prist a dementer,
E son chier fil sovent a regreter.
XXVII "Filz Alexis, por queit portat ta medre?
Tu m'ies foïz, dolente en sui remese.
Ne sai le lueu ne ne sai la contrede
O t'alge querre: tote en sui esguarede.
Ja mais n'ier liede, chiers filz, ne n'iert tes pedre."
XXVIII Vint en la chambre, pleine de marrement,
Si la desperet que n'i remest neient:
N'i remest palie ne neul ornement.
A tel tristour atornat son talent
Onc puis cel di nes contint liedement.
XXIX "Chambre," dist ele, "ja mais n'estras parede,
Ne ja ledece n'iert en tei demenede!"
Si l'at destruite com s'ost l'oüst predede;
Sas i fait pendre e cinces deramedes:
Sa grant onour a grant duel at tornede.
XXX Del duel s'assist la medre jus a terre,
Si fist la spouse dam Alexis a certes:
"Dame", dist ele, "jo ai fait si grant perte!
Des or vivrai en guise de tortrele:
Quant n'ai ton fil, ensemble o tei vueil estre."
XXXI Respont la medre: "S'o mei te vuels tenir,
Sit guarderai por amour Alexis
Ja n'avras mel dont te puisse guarir.
Plaignoms ensemble le duel de nostre ami,
Tu por ton per, jol ferai por mon fil."
XXXII Ne puet altre estre, metent l'el considrer;
Mais la dolour ne puedent oblider,
Damz Alexis en Alsis la citet
Sert son seignour par bone volentet:
Ses enemis nel puet onc enjaner.
XXXIII Dis e set anz, n'en fut neient a dire,
Penant son cors el Damnedeu servisie:
Por amistiet ne d'ami ne d'amie
Ne por onours qui lui fussent tramises
N'en vuelt torner tant come il at a vivre.
XXXIV Quant tot son cuer en at si afermet
Que ja son vuel n'eistrat de la citet,
Deus fist l'imagene por soue amour parler
Al servitour qui serveit a l'alter;
Ço li comandet: "Apele l'ome Deu."
XXXV Ço dist l'imagene: "Fai l'ome Deu venir:
Quer il at Deu bien a gret servit,
Ed il est dignes d'entrer en paradis."
Cil vait, sil quiert, mais il nel set choisir,
Icel siant ome de cui l'imagene dist.
XXXVI Revint li costre a l'imagene el mostier:
"Certes", dist il, "ne sai cui entercier."
Respont l'imagene: "Çost cil qui tres l'uis siet.
Pres est de Deu e del regne del ciel:
Par nule guise ne s'en vuelt esloignier."
XXXVII Cil vait, sil quiert, fait l'el mostier venir.
Es vos l'essample par trestot le païs
Que cele imagene parlat por Alexis:
Trestuit l'onourent, li grant e li petit,
E tuit li prient que d'els aient mercit.
XXXVIII Quant il co veit quel vuelent onorer:
"Certes", dist il "n'i ai mais ad ester;
D'iceste onour nem revueil encombrer
En mie nuit s'en fuit de la citet:
Deit a Lalice rejoint li sons edrers.
XXXIX Damz Alexis entrat en une nef:
Ourent lour vent, laisse corre par mer;
Dreit a Tarson espeiret arriver,
Mais il ne puet estre; aillours l'estuet aler:
Tot dreit a Rome les portet li orez.
XL Ad un des porz qui est pres de Rome,
Iluec arrivwet la nef a cel saint ome.
Quant veit son regne, molt fortment se redotet
De ses parenz, qued il nel reconoissent
E de l'onour del siecle ne l'encombrent.
XLI "E! Deus", dist il, "bels reis qui tot governes,
Se tei ploüst, ici ne volsisse estre.
S'or me conoissent mi parent d'estre terre,
Il me prendront par pri o par podeste:
Se jos en creit, il me trairont a perte.
XLII "E neporuec mes pedre me desidret,
Si fait ma medre plus que feme qui vivet,
Avuec ma spouse que jo lour ai guerpide.
Or ne lairai nem mete en lour baillie:
Nem conoistront: tanz jourz at que nem vidrent."
XLIII Ist de la nef e vait edrant a Rome:
Vait par les rues dont il ja bien fut cointes,
Altre puis altre, mais son pedre i encontret,
Ensemble o lui grant masse de ses omes;
Sil reconout, par son dreit nom le nomet.
XLIV "Eufemiiens, bels sire, riches om,
Quer me heberge por Deu en ta maison:
Soz ton degret me fai un grabatum
Empor ton fil dont tu as tel dolour.
Toz sui enfers, sim pais por soue amour."
XLV Quant ot li pedre la clamour de son fil,
Plourent sui ueil, ne s'en puet astenir:
"Por amour Deu e por mon chier ami
Tot te donerai, bons om, quant que m'as quis,
Lid ed ostel e pain e charn e vin.
XLVI "E!Deus", dist il, "quer oüsse un serjant
Quil me guardast! Jo l'en fereie franc."
Un en i out qui sempres vint avant:
"Es mei", dist il, "quil guart par ton comant:
Por toue amour en soferrai l'ahan."
XLVII Cil le menat endreit soz le degret:
Fait lui son lit o il puet reposer;
Tot li amanvet quant besoinz li ert:
Vers son seignour ne s'en vuelt mesaler;
Par nule guise ne l'en puet om blasmer.
XLVIII Sovent le vindrent e li pedre e la medre
E la pucele qued il out esposede:
Par nule guise onques ne l'aviserent;
N'il ne lour dist, ned il nel demanderent,
Quels om esteit ne de quel terre il eret.
XLIX Soventes feiz les veit grant duel mener,
E de lour uelz molt tendrement plorer,
Trestot por lui, onques neient por el:
Il les esguardet, sil met el considrer;
N'at soing quel veiet, si est a Deu tornez.
L Soz le degret o il gist sour sa nate,
Iluec paist l'om del relief de la table.
A grant poverte deduit son grant parage:
Ço ne vuelt il que sa medre le sachat:
Plus aimet Deu que trestot son lignage.
LI De la viande qui del herberc li vient
Tant en retient dont son cors en sostient:
Se luin remaint sil rent as provendiers;
N'en fait musjode por son cors engraissier;
Mais as plus povres le donet a mangier.
LII En sainte eglise converset volentiers;
Chascune feste se fait acomungier;
Sainte escriture ço ert ses conseillers:
Del Deu servisie le ruevet esforcier;
Par nule guise ne s'en vuelt esloignier.
LIII Soz le degret o il gist e converset,
Iluec deduit liedement sa poverte.
Li serf son pedre qui la maisniede servent
Lour lavedures li getent sour la teste:
Ne s'en corrocet ned il nes en apelet.
LIV Tuit l'escharnissent, sil tienent por bricon:
L'aive li getent, si mueillent son liçon;
Ne s'en corrocet giens cil saintismes om,
Ainz priet Deu qued il le lour pardoinst
Par sa mercit, quer ne sevent que font.
LV Iluec converset ensi dis e set anz.
Nel reconout nuls sons apartenanz;
Ne neuls om ne sout les sons ahanz,
Fors soul le lit o il at geut tant:
Ne puet muder ne seit aparissant.
LVI Trente quatre anz at si son cors penet;
Deus son servisie li vuelt guedredoner:
Molt li agrieget la soue enfermetet;
Or set li bien qued il s'en deit aler:
Cel son serjant at a sei apelet.
LVII "Quier mei, bels fredre, ed enque e parchemin
Ed une pene, ço pri, toue mercit."
Cil li aportet, receit les Alexis;
De sei medisme tote la chartre escrist,
Com s'en alat e come il s'en revint.
LVIII Tres sei la tint, ne la volst demostrer,
Nel reconoissent usque il s'en seit alez.
Parfitement s'at a Deu comandet.
Sa fin apruismet, ses cors est agrevez;
De tot en tot recesset del parler.
LIX En la sedmaine qued il s'en deut aler
Vint une voiz tries feiz en la citet
Fors del sacrarie, par comandement Deu,
Qui ses fedeilz i at toz evidez:
Prest est la glorie qued il li vuelt doner.
LX A l'altre voiz lour fait altre somonse,
Que l'ome Deu quiergent qui gist en Rome,
Si li deprient que la citet ne fondet
Ne ne perissent la gent qui enz fregondent:
Qui l'ont odit remainent en grant dote.
LXI Sainz Innocenz eret idonc apostolies.
A lui en vindrent e li riche e li povre,
Si li requierent conseil d'icele chose
Qu'il ont odide, qui molt les desconfortet:
Ne guardent l'oure que tere les enclodet.
LXII Li apostolies e li emperedour,
Li uns Arcadie, li altre Onorie out nom,
E toz li pueples par comune oreison
Deprient Deu que conseil lour en doinst,
D'icel saint ome par cui li guariront.
LXIII Ço li deprient, la soue piëtet,
Que lour enseint ol puissent recovrer.
Vint une voiz qui lour at enditet:
"En la maison Eufemiien querez.
Quer iluec est, iluec le troverez."
LXIV Tuit s'en retornent sour dam Eufemiien;
Alquant le prenent fortment a blastengier:
"Iceste chose nos deusses noncoer,
A tot le pueple qui ert desconseilliez.
Tant l'as celet molt i as grant pechiet."
LXV Il s'escondit com li om qui nel set;
Mais ne l'en creident: al herberc sont alet.
Il vait avant la maison aprester;
Fortment l'enquiert a toz ses menestrels:
Icil respondent que neuls d'els nel set.
LXVI Li apostolies e li emperedour
Siedent es bans e pensif e plorous,
Si les esguardent tuit cil altre seignour:
Deprient Deu que conseil lour en doinst
D'icel saint ome par cui il guariront.
LXVII En tant dementres come il iluec ont sis
Desseivret l'aneme del cors saint Alexis:
Tot dreitement en vait en paradis
A son seignour qu'il aveit tant servit.
E! reis celestes, tu nos i fai venir!
LXVIII Li bons serjanz quil serveit volentiers
Il le nonçat son pedre Eufemiien;
Soef l'apelet, si li at conseillat:
"Sire", dist il, "morz est tes provendiers,
E ço sai dire qu'il fut bons crestiiens.
LXIX "Molt longement ai o lui converset:
De nule chose certes nel sai blasmer
E ço m'est vis que ço est li om Deu."
Toz souls s'en est Eufemiiens tornez;
Vint a son fil o gist soz son degret.
LXX Les dras sozlievet dont il esteit coverz:
Vit del saint ome le vis cler e bel;
En son poing tient sa chartre li Deu sers,
O at escrit trestot le son convers:
Eufemiiens vuelt saveir qued espelt.
LXXI Il la vuelt prendre: cil ne li vuelt guerpir.
A apostolie revient toz esbaïz:
"Ore ai trovet ço que tant avoms quis:
Soz mon degret gist uns morz pelerins;
Tient une chartre, mais ne li puis tolir."
LXXII Li apostolies e li emperedour
Vienent devant, getant s'ad oreisons,
Metent lour cors en granz afflictions:
"Mercit, mercit, mercit, saintismes om!
Net conoümes n'encor net conoissoms.
LXXIII "Ci devant tei estont dui pechedour,
Par la Deu gracie vochiet emperedour;
Çost sa mercit qu'il nos consent l'onour.
De tot cest mont somes nos jugedour:
Del ton conseil somes tuit besoignous.
LXXIV "Cist apostolies deit les anemes baillir:
Çost ses mestiers dont il at a servir;
Done li la par la toue mercit:
Ço nos dirat qu'enz troverat escrit,
E ço doinst Deus qu'ore en poissiems guarir!"
LXV Li apostolies tent sa main a la chartre;
Sainz Alexis la soue li alaschet:
Lui la consent qui de Rome esteit pape.
Il ne la lit ned il dedenz n'esguardet:
Avant la tent ad un bon clerc e savie.
LXVI Li chanceliers, cui li mestiers en eret,
Cil list la chartre; li altre l'escolterent.
D'icele geme qued iluec ont trovede
Le nom lour dist, del pedre e de la medre,
E ço lour dist de quels parenz il eret.
LXXVII E ço lour dist com s'en foït par mer
Come en alat en Alsis la citet,
E com l'imagene Deus fist por lui parler,
E por l'onour dont nes volst encombrer
S'en refoït en Rome la citet.
LXXVIII Quant ot li pedre ço que dit at la chartre,
Ad ambes mains deromt sa blanche barbe:
"E! filz", dist il, "com dolorous message!
Vis atendeie qued a mei repaidrasses,
Par Deu mercit que tum reconfortasses."
LXXIX A halte voiz prist li pdre a crider:
"Filz Alexis, quels duels m'est presentez!
Malviase guarde t'ai fiat soz mon degret.
A! las, pechables, com par fui avoglez!
Tant t'ai vedut, si net poi aviser!
LXXX "Filz Alexis, de ta dolente medre!
Tantes dolours at por tei enduredes,
E tantes faims e tantes seiz passedes,
E tantes lairmes por le ton cors ploredes!
Cist duels l'avrat encui par acorede.
LXXXI "O filz, cui ierent mes granz ereditez,
Mes larges terres dont jo aveie assez,
Mi grant palais en Rome la citet?
Empor tei, filz, m'en estei penez:
Puis mon deces en fusses onorez.
LXXXII "Blanc ai le chief e la barbe ai chenude:
Ma grant onour aveie retenude
Empor tei, filz, mais n'en aveies cure.
Si grant dolour ui m'est apareude!
Filz, la toue aneme seit el ciel assolude!
LXXXIII "Tei convenist helme e bronie a porter,
Espede a ceindre come tui altre per;
Ta grant maisniede deusses governer,
Le gonfanon l'emperedour porter,
Com fist tes pedre e li tons parentez.
LXXXIV "A tel dolour ed a si grant poverte,
Filz, t'ies deduiz par aliënes terres!
E d'icel bien qui toz deust tons estre
Pou en perneies en ta povre herberge:
Se Deu ploüst, sire en deusses estre."
LXXXV De la dolour que demenat li pedre
Grant fut la noise, si l'entendit la medre:
La vint corant com feme forsenede;
Batant ses palmes, cridant, eschevelede;
Veit mort son fil, a terre chiet pasmede.
LXXXVI Qui donc li vit son grant duel demener
Son piz debatre e son cors degeter,
Ses crins detraire e son vis maiseler,
Et son mort fil baisier ed acoler,
N'i out si dur ne l'estoüst plorer.
LXXXVII Trait ses chevels e debat sa peitrine,
A grant duel met la soue charn medisme:
"E! filz" dist ele, "com m'oüs enhadide!
E jo, dolente, com par fui avoglide!
Net conoisseie plus qu'onques net vedisse."
LXXXVIII Plourent sui ueil e si getet granz criz;
Sempres regretet: "Mar te portai, bels filz!
E de ta medre que n'aveies mercit?
Por teim vedeies desidrer a morir:
Çost grant merveille que pitiet ne t'en prist!
LXXXIX "A! lasse, mesdre, come oi fort aventure!
Ci vei jo morte tote ma portedure.
Ma longe atente a grant duel est venude.
Que podrai faire, dolente, malfadude?
Çost grant merveille que li miens cuers tant duret!
XC "Filz ALexis, molt oüs dur corage
Quant adossas tot ton gentil lignage!
Sed a mei soule vels une feiz parlasses,
Ta lasse medre si la reconfortasses,
Que sist dolente! Chiers filz, buer i alasses.
XCI "Filz Alexis, de la toue charn tendre!
A quel dolour deduit as ta jovente!
Por queim foïs? jat portai en mon ventre;
E Deus le set que tote sui dolente:
Ja mais n'ier liede por ome ne por feme.
XCII "Ainz que t'oüsse en fui molt desidrouse;
Ainz que nez fusses sin fui molt angoissouse;
Quant jot vi net sin fui liede e joiouse;
Or te vei mort, tote en sui courroçouse:
Co peiset mei que ma fin tant demouret.
XCIII "Seignour de Rome, por amour Deu, mercit!
Aidiez m'a plaindre le duel de mon ami.
Granz est li duels qui sour mei est vertiz;
Ne puis tant faire que mes cuers s'en sazit:
Nen est merveille: n'ai mais fille ne fil."
XCIV Entre le duel del pedre e de la medre
Vint la pulcele qued il out esposede:
"Sire", dist ele, "com longe demorede!
Atendut t'ai en la maison ton pedre,
O tum laissas dolente ed esguarede.
XCV "Sire Alexis, tanz jorz t'ai desidret,
E tantes lairmes por le ton cors ploret,
E tantes feiz por tei en loinz guardet,
Se revenisses ta spouse conforter,
Por felonie neient ne por lastet!
XCVI "O chiers amis, de ta jovente bele!
Ço peiset mei que podrirat en terre.
E! gentils om, com dolente puis estre!
Jo atendeie de tei bones noveles,
Mais or les vei si dures e si pesmes!
XCVII "O bele boche, bels vis, bele faiture,
Com vei mudede vostre bele figure!
Plus vos amai que nule creature.
Si grant dolour ui m'est apareude!
Mielz me venist, amis, que morte fusse.
XCVIII "Se jot soüsse la jus soz le degret,
O as geut de longe enfermetet,
Ja tote gent nem soüssent torner
Qu'ensemble o tei n'oüsse converset:
Se mei leust, si t'oüsse guardet.
XCIX "Or sui jo vedve, sire", dist la pulcele,
"Ja mais ledece n'avrai, quer ne puet estre,
Ne charnel ome n'avrai ja mais en terre.
Dieu servirai, le rei qui tot governet:
Il nem faldrat, s'il veit que jo lui serve."
C Tant i plorent e li pedre e la medre
E la pulcele que tuit s'en alasserent.
En tant dementres le saint cors conrederent
Tuit cil seignour e bel l'acostumerent:
Com felix cil qui par feit l'onourent!
CI "Seignour, que faites?" ço dist la pulcele,
"Que valt cist criz, cist duels ne ceste noise?
Cui que sit duels, a nostre ues est il joie;
Quer par cestui avroms bon adjutorie:
Si li peioms que de toz mals nos tolget."
CII Trestuit le prenent qui pourent avenir;
Chantant en portent le cors saint Alexis,
E ço li preient que d'els aient mercit.
N'estuet somondre icels qui l'ont odit:
Tuit i acorent, li grant e li petit.
CIII Si s'en comourent tote la gent de Rome
Plus tost i vint qui plus tost i pout corre.
Par mi les rues en vienent si granz torbes
Ne reis ne coms n'i puet faire entrerote,
Ne le saint cors ne puedent passer oltre.
CIV Entre els en prenent cil seignour a parler:
"Grant est la presse: nos n'i podroms passer.
Por cest saint cors que Deus nos at donet
Liez est li pueples, qui tant l'at desidret:
Tuit i acorent, nuls ne s'en vuelt torner."
CV Cil en respondent qui l'empereie, baillissent:
"Mercit, seignour! nos en querroms mecine:
De noz aveirs feroms granz departides
La main menude, qui l'almosne desidret:
S'il nos font presse, donc en ermes delivre."
CVI De lour tresor prenent l'or e l'argent,
S'il font geter devant la povre gent:
Par iço cuident aveir descombrement;
Mais ne puet estre; cil n'en ruevent neient:
A cel saint cors ont tornent lour talent.
CVII Ad une voiz crident la gent menude:
"De cest aveir certes nos n'avroms cure.
Si grant ledece nos est apareude
D'icest saint cors, n'avroms soing d'altre mune;
Quer par cestui avroms nos bone aiude."
CVIII Onques en Rome nen out si grant leticie
Come out le jorn as povres ed as riches
Por cel saint cors qu'il ont en lour baillie:
Ço lour est vis que tiengent Deu medisme;
Trestoz li pueples lodet Deu e graciet.
CIX Sainz Alexis out bone volentet:
Poruec en est ui cest jorn onorez.
Li cors en gist en Rome la citet
E l'aneme en est enz el paradis Deu:
Bien puet liez estre qui si est aloez.
CX Qui at pechiet bien s'en puet recorder:
Par penitencie s'en puet tres bien salver.
Bries est cist siecles: plus durable atendez.
Ço depreioms la sainte trinitet
Qu'o lui ensemble poissems el ciel regner.
CXI Sorz ned aveugles ne contraiz ne leprous,
Ne muz ned ors ne nuls palasinous,
Ensorquetot ne neuls langourous,
Nul n'en i at quin alget malendous,
Cel n'en i at quin report sa dolour.
CXII N'i vient enfers de nule enfermetet
Quant li apelet sempres n'aiet santet.
Alquant i vont, alquant se font porter.
Si veirs miracles lour at Deus demostrez
Qui vint plorant chantant l'en fait raler.
CXIII Cil dui qui l'emperie governent,
Quant li i veident les vertuz si apertes,
Il le receivent, sil portent e sil servent:
Alques per pri e le plus par podeste
Vont en avant, si derompent la presse.
CXIV Sainz Boneface, qued om martir apelet,
Aveit en Rome une eglise molt bele:
Iluec en portent saint Alexis a certes
Ed atement le posent a la terre.
Felix li lueus o ses sainz cors herberget!
CXV La gent de Rome, qui tant l'ont desidret,
Set jorz le tienent sour terre a podestet.
Grant est la presse, ne l'estuet demander:
De totes parz l'ont si avironent
Qued avisonques i puet om abiter.
CXVI Al sedme jorn fut faite la herberge
A cel saint cors, a la geme celeste;
En sus se traient, si alaschet la presse:
Vueillent o non, sil laissent metre en terre;
Ço peisent els, mais altre ne puet estre.
CXVII Ad encensiers, ad ories chandelabres
Clerc revestut en albes ed en chapes
Metent le cors enz el sarcueu de marbre.
Alquant i chantent, li pluisour getent lairmes:
Ja le lour vuel de lui ne dessevrassent.
CXVIII D'or e de gemes fut il sarcueus parez
Por cel saint cors qu'il i deivent poser;
En terrel metent par vive podestet.
Plourent li pueples de Rome la citet:
Soz ciel n'at ome quis puissent conforter.
CXIX Or n'estuet dire, del pedre e de la medre
E de la spouse come il le regreterent;
Quer tuit en ont lour voiz si atempredes
Que tuit le plainstrent e tuit le doloserent:
Cel jorn i out cent mil lairmes ploredes.
CXX Dessoure terre nel pourent mais tenir:
Vueillent o non, sil laissent enfodir;
Prenent congiet al cors saint Alexis,
E si li prient que d'els aient mercit,
Al son seignour il lour seit bons plaidis.
CXXI Vait s'en li pueples. E li pedre e la medre
E la pucele onques ne dessevrerent:
Ensemble furent jusque a Deu s'en ralerent.
Lour compaignie fut bone ed onorede:
Par cele saint ome sont lour anemes salvedes.
CXXII Saint Alexis est el ciel senz dotance,
Ensemble o Deu, en la comagnie as angeles,
O la pucele dont se fist si estranges;
Or l'at o sei, ensemble sont lour anemes:
Ne vos sai dire com lour ledece est grande.
CXXIII Com bone peine, Deus, e com bon servisie,
Fist cil saint om en ceste mortel vide!
Quer ore est s'aneme de glorie replendide:
Ço at ques vuelt, n'en est neient a dire;
Ensourquetot e si veit Deu medisme.
CXXIV Las! malfadut! come esmes encombret!
Quer ço vedoms que tuit somes desvet.
De noz pechiez somes si avoglet
La deite vide nos font tresoblider:
Par cest saint ome deussoms ralumer.
CXXV Aiems, Seignour, cest saint ome en memorie,
Si li preioms que de toz mals noz tolget:
En icest siecle nos achat pais e joie,
Ed en cel altre la plus durable glorie